Está inmerso o PP e concretamente a súa Secretaria Xeral Paula Prado, nunha campaña de desacreditación das reividindicacións que levan feito as familias arredor do ensino público. Prado chegou a asegurar que a manifestación convocada pola Confederación de ANPAS Galegas do pasado 28 de febreiro reclamando o dereito ao unha educación digna e inclusiva para o alumnado galego, estaban “politizadas”, e que mesmo foron organizadas polo BNG.
Unhas declaracións que non pasaron desapercibidas para a ANPA do CEIP de Prácticas da Coruña, que leva meses denunciando a situación de abandono extremo que sofre o centro de Labañou, e que quere destacar o valor das máis de 5.000 persoas que se uniron para demandar aumento no profesorado e infraestruturas seguras para as nosas crianzas.
“Cando toda a cidadanía sae á rúa, ben sexa en Compostela ou na Coruña baixo unha mesma mensaxe, o seu é escoitala e non arremeter contra ela”, declaran dende a ANPA.
Trasladan ademais o seu apoio ás compañeiras de ANPAS Galegas e mandan unha mensaxe tanto á señora Prado coma ao Conselleiro de Educación: “isto soamente acaba de comezar, as familias non pararemos ata que se nos escoite e se respecte o dereito das crianzas a unha educación pública e de calidade tal e como se recolle na Convención dos dereitos do neno”
Máis novas
Así foi a manifestación da comunidade escolar do CEIP Prácticas “por unha escola segura e digna”
