O presidente da Cámara de Comercio da Coruña, Antonio Couceiro, pediu “consenso”, coa participación de todas as partes implicadas, para abordar o absentismo laboral, que cualificou de “cáncro para a economía e a sociedade” se continúa a tendencia actual.

Nunha rolda de prensa na que presentou o balance de actividades do organismo cameral, referiuse a este asunto para insistir na “sobrecarga de traballo para outros empregados” que supón nas pequenas e medianas empresas (pemes), ademais da súa incidencia no “incremento de custos”, especialmente nas grandes empresas. “É algo estrutural“, insistiu, subliñando o maior porcentaxe de baixas entre as persoas menores de 35 anos. Por iso, apelou a analizar os factores relacionados co absentismo laboral ante o seu “crecemento constante”.

ACTIVIDADE DA CÁMARA

Pola súa banda, xunto co director xeral, Manuel Galdo, explicou que, de cara a 2026, a Cámara continuará executando o Plan Estratéxico 2021-2027, coa finalidade de consolidar o crecemento da súa base social, reforzar as súas infraestruturas e ampliar os programas de apoio a empresas, emprendedores e ao emprego.

En concreto, indicaron que o organismo cameral apoiou case 1.800 empresas e 3.900 particulares con 5,24 millóns de euros. Ademais, pechou o exercicio con resultado positivo e superávit orzamentario. A entidade desenvolveu a súa actividade sobre o citado Plan Estratéxico, reforzando as súas principais áreas de actuación e impulsando novas infraestruturas e servizos. No ámbito da internacionalización, a Cámara destinou 900.000 euros ao apoio á saída ao exterior das empresas, organizando 30 accións de promoción internacional en 17 países, nas que participaron 152 empresas.