O presidente da Confederación de Empresarios de Galicia (CEG), Juan Vieites, remitiu ao titular da patronal da Coruña, Antonio Fontenla, ante as protestas de representantes do sector téxtil, que este martes trasladaron a súa acampada reivindicativa ata as portas da organización galega mentres esta celebraba a súa asemblea. En todo caso, Vieites criticou con dureza as actitudes de “acoso e derriba” contra persoas concretas, en referencia directa á secretaria xeral da confederación de empresarios coruñesa.
“Estamos un pouquiño molestos”, advertiu o líder da patronal galega en declaracións aos medios de comunicación, sobre unhas actuacións producidas nas últimas semanas que, ao seu xuízo, “excederon dos límites tanto na Coruña como aquí”, pola capital galega. “Non as aprobamos”, incidiu de xeito tallante. Neste sentido, avogou por tentar entre todos buscar que o diálogo social sexa produtivo e rexeitou algunhas condutas que motivaron que unha persoa na Coruña tivese que darse de baixa por motivos de saúde por ese continuo acoso, en concreto a secretaria xeral provincial.
A asemblea da CEG determinou que esas actuacións non son as desexables e acordou transmitir tanto ao Consello Galego de Relacións Laborais como ao Consello Económico e Social que estes non son os camiños para chegar a consensos. Segundo Vieites, “todo se pode discutir, todo se pode falar, pero pasarse dos límites como se está pasando, focalizando en persoas determinadas…”, é inadmisible. Neste extremo, o presidente da patronal avisou de que, de seguir así, as empresas deixarán de asistir a estes encontros de negociación.
“NIN ME VOU A PREOCUPAR”
Nas declaracións aos xornalistas, e ante o ruído dunha protesta que chegaba con claridade ao interior da sede da CEG, Vieites sinalou: “A nós non nos dixeron nada. A CEG non sabemos que están a discutir, nin me vou a preocupar”. Así, aclarou que as confederacións provinciais teñen aprobados os convenios correspondentes e aludiu directamente a Antonio Fontenla para xestionar o conflito sectorial.
A acampada do sector téxtil leva xa 15 días instalada fronte á sede da confederación da Coruña. Vieites asegurou que no seo da patronal coruñesa están dispostos a seguir falando coas centrais sindicais, pero deixou claro que non o farán baixo presións ao entender que non é unha boa praxe negociadora. En todo caso, o líder autonómico preferiu que sexa o propio Fontenla o que se pronuncie sobre os termos do convenio colectivo.
