A Universidade da Coruña (UDC) e Vento Avogados & Asesores asinaron este luns un convenio de colaboración para a creación da Cátedra UDC-Vento de Intelixencia Artificial para o Sector Legal e Empresarial, unha iniciativa que nace co obxectivo de promover a formación, a investigación e a innovación no ámbito da intelixencia artificial aplicada nos servizos xurídicos, fiscais e empresariais.

O acto de firma tivo lugar na Reitoría da Universidade da Coruña e contou coa participación do reitor, Ricardo Cao, e dos directores xerales de Vento Avogados & Asesores, Tomás Dapena Carabel e Santiago Carreira Morodo, así como de responsables da área de investigación e transferencia da UDC e do futuro equipo directivo da cátedra. Durante a súa intervención, o reitor destacou a importancia desta nova cátedra da UDC, que nace como “un espazo de investigación e transferencia nun campo crave como é a IA e no que na Universidade da Coruña conta con excelentes profesionais”.