InicioA CORUÑAAs festas de María Pita: arte, música e cultura no corazón da...

As festas de María Pita: arte, música e cultura no corazón da Coruña

Publicada o

Por Claudia Varela Lourido

A cantante Luz Casal abrirá o 1 de agosto as festas de María Pita, que incluirán unha proposta variada de artistas e de xéneros, segundo informou a alcaldesa, Inés Rey, na presentación destas. Delas, sinalou que incluirán unha programación que volverá converter a cidade “no gran escenario cultural e festivo de Galicia” durante os meses de xullo e agosto.

Rey estivo acompañada polo autor do cartel, o artista coruñés Correa Corredoira, a artista Mercedes Peón e o concelleiro de Cultura e Turismo, Gonzalo Castro. No cartel deste ano, o artista coruñés representa a cidade e os seus elementos máis característicos nunha peza exclusiva. “Un creador cunha traxectoria sólida e unha linguaxe propia, que sitúa a súa obra entre a tradición e a modernidade, e que nos entrega unha peza única, con personalidade e forza, á altura do que representan estas festas”, subliñou Inés Rey sobre unhas festas que terán como pregoeira a actriz e humorista Lucía Veiga.

“Apostamos por unha programación ampla, diversa e de calidade, que encherá a cidade de actividade todos os días do mes”, afirmou a rexedora. A programación arrincará xa a mediados de xullo co Festival Manicómicos e estenderase ata finais de agosto, combinando música en directo, cultura popular, artes escénicas e propostas familiares en distintos barrios da cidade.

A praza de María Pita volverá ser o gran escenario das festas, coa celebración das Noites de María Pita, que contarán cun cartel variado e con artistas de primeiro nivel. O ciclo abrirase o 1 de agosto con Luz Casal, tras o pregón de Lucía Veiga, e contará tamén coas actuacións de Mercedes Peón (2 de agosto), Lana Delio Valdez (3 de agosto) e o macroevento Los40 Summer Live (4 de agosto), con artistas como DePol, Enol ou Chema Rivas.

Despois da pausa do Noroeste, o programa musical continuará con Ginebras (9 de agosto), o espectáculo familiar ‘El Libro de la Selva’ (10 de agosto) e The Rapants (11 de agosto). Ademais, haberá a actuación da orquestra Los Satélites coincidindo co eclipse (12 de agosto) e o concerto de Fillas de Cassandra (13 de agosto). Pechará o ciclo Israel Fernández o 15 de agosto. Isto, dentro doutras propostas no Teatro Colón ou a tradicional Batalla Naval.

ÚLTIMAS

(VÍDEO): Desaloxan varios colexios da Coruña tras recibiren sendas falsas ameazas de bomba

Mañá axitada en varios colexios da cidade. Os CEIP Zalaeta, CEIP Raquel Caamacho, o...

Máis dun centenar de obras preséntanse aos Premios Mestre Mateo, con entrega de galardóns en febreiro

Un total de 155 obras presentaron candidatura aos XXV Premios Mestre Mateo, cuxa gala...

A Coruña aposta por un Nadal “sustentable e responsable” nunha nova edición da Casa dos Xoguetes

O Concello da Coruña, a través da Oficina Municipal de Información ao Consumidor (OMIC),...

O coruñés Daniel Agra regresa ao India Photo Fest con catro fotografías

O artista galego Daniel Agra presenta catro fotografías da súa serie Tesseract Daydreams no...

DEIXAR UN COMENTARIO

Please enter your comment!
Please enter your name here