O PP rexistrou no Senado unha batería de preguntas escritas sobre a antiga prisión xa que considera que “debe volver gratis” ao patrimonio municipal e que o Goberno do Estado ten que “facerse cargo do diñeiro para a súa rehabilitación por ser o único responsable da súa deterioración”. Segundo traslada a formación política nun comunicado, fíxoo a senadora Rosa Gallego, en coordinación co portavoz do grupo municipal popular, Miguel Lorenzo, tras unha sentenza sobre esta cuestión da Audiencia Provincial.
A mesma desestimou o último recurso presentado pola Avogacía do Estado e confirmou que exime ao Concello herculino de abonar preto de 15 millóns de euros ao Goberno central, atribuíndo ao Estado os gastos de mantemento e vixilancia do inmoble. Confirma, así, a nulidade do convenio subscrito en 2025 co Estado para recuperar a penitenciaría.
O PP pregunta se o Executivo central vai recorrer ante o Tribunal Supremo (TS) dita sentenza ou “vai acatala e devolver ao Concello a prisión provincial de forma gratuíta“. Pregunta tamén, entre outras cuestións, polos prazos desta operación e se está a negociar co consistorio as condicións para a dita devolución.
TITULARIDADE DO PAZO DE MEIRÁS
A Comisión pola Recuperación da Memoria Histórica (CRMH) da Coruña demandou o cambio no rexistro da titularidade do Pazo de Meirás xa que, segundo sosteñen, “o Franco seguen de titulares rexistrais”. Nun comunicado, afirma que case catro meses despois da sentenza do Tribunal Supremo pola que o inmoble pasou ser do Estado e, por tanto de titularidade pública, “a leira do Pazo segue rexistrada a nome do Franco, tal e como consta na nota simple emitida polo Rexistro da Propiedade a día de hoxe”.
