A Asoc. Veciñal Agra presentaba esta mañá de martes 4 de agosto unha alegación común asinada por preto de 5.800 persoas a favor do Parque da Agra e en contra do Proxecto de Urbanización que pretende o Concello no prometido espazo verde.

A entidade rexistou unhas alegacións fronte á Modificación Puntual do PXOM no ámbito do polígono M22 por considerar que se trata dun “expediente viciado: incompleto e con erros documentais“. Para a comprometida veciñanza, “o Convenio e a MP-PXOM en trámite parten de premisas erróneas e argumentacións xustificativas fraudulentas, equívocas e enganosas respecto dos efectos da sentenza do TSXG2.

E poñen cifras: “con este expediente (DPE/2025/56) DRICAR multiplica por 3,35 veces a edificabilidade, cun incremento de + 235 % respecto do planeamento vixente (PXOM/1998)”.

I é que a campaña do “Parque da Agra Xa! non é unicamente un lema e reivindicación cidadá, tamén é a esixencia de cumprimento dos estándares de reserva dotacional de ZV/EL que se conteñen en distintas normas, plans e programas e o manifesto déficit que o barrio ten respecto desa dotación, tan afastada das ratios aconsellables por distintos organismos como a OMS (Organización Mundial da Saúde) ou a UE”, valoran.

Argumentos

Ademais de ver un informe “con erros e incompleto), a entidade xa alertou ademais do posible conflito de intereses na equipa redactora, e considera que esta “ordenación é contraria á legalidade, ao interese público e ás demandas da veciñanza en relación co parque público da Agra”

Entre os argumentos tamén consideran “insuficiente e deficiente estudo de mobilidade”, así como “insuficiente e deficiente estratexia de actuación (EA), estudo económico (EE), Informe de sustentabilidade económica (ISA) e memoria de viabilidade económica (MVE)”

Peticións

Con estas alegacións a Asociación veciñal Agra solicita que:

• Non se aprobe MP-PXOM-Parque da Agra do expediente DPE/2025/56 (o que deixaría sen efecto ningún o Convenio urbanístico de 20/06/2024).
• Arquivar o expediente DPE/2025/56.
• Incoar un novo expediente de MP-PXOM que garanta un Parque da Agra consonte as necesidades e demandas reais deste barrio e da cidade da Coruña.

Propostas

Pero non queda aí a entidade veciñal, e ofrece ao Concello “diversa ferramentas técnicas e legais, ao alcance de calquera que interveña con honestidade, responsabilidade e vontade de servizo público na consecución dun parque urbano no barrio da Agra do Orzán”.

Así, a asociación veciñal considera que o Concello da Coruña debería

• Procurar a cesión gratuíta das propiedades de titularidade pública neste ámbito, de acordo co art. 145 da Lei 33/2003, de 3 de novembro, do Patrimonio das Administracións Públicas: unha parte substancial da propiedade do POL-M22 xa é de titularidade pública. Poñemos por caso: a parcela do Observatorio, de propiedade estatal, ten 7.812 m2, parte dos cales, excluídos os edificios existentes EQ3 e EQ2, poderían ser cedidos gratuitamente ao Concello para ZV/EL.
• Procurar solucións de urbanismo táctico, non edificatorias, para tapar medianeiras como as experimentadas en Barcelona, París etc.
• Aplicar un criterio básico de garantía material do exercicio de participación pública: procurar a integridade documental do expediente, sen contradicións nin erros entre os distintos documentos conformadores deste expediente.
• Iniciar unha nova MP-PXOM redactada por unha equipa multidisciplinaria independente e sen relación profesional previa con DRICAR neste proceso.

Máis novas do conflito