Un home faleceu este venres ao caerse mentres realizaba traballos de pintura nun domicilio da Coruña. As causas do falecemento están por determinar, xa que os axentes da Policía Nacional non descartan que sufrise unha indisposición previa á caída. Pasadas as cinco desta tarde, o 112 Galicia recibiu un aviso por un traballador inconsciente tras caer dunha banqueta cando pintaba. Sucedeu nun domicilio da Rolda do Outeiro, na Coruña.

Para atender a persoa, os xestores do Centro Integrado de Atención ás Emerxencias de Galicia solicitaron a intervención dos profesionais de Urxencias Sanitarias de Galicia-061, que, pouco despois, confirmaron o falecemento do traballador. Con todo, as causas están por dilucidar, dado que os servizos de emerxencias non descartan que o pintor sufrise un problema de saúde previo á caída.