O Centro Integrado de Atención ás Emerxencias xestionou 406 incidencias e 2.122 chamadas relacionadas co temporal vivido na Comunidade entre as 11.00 horas deste pasado martes e as 06.00 horas da madrugada do mércores.

A provincia da Coruña foi a máis afectada, con 192 incidencias, seguida de Pontevedra (142), Lugo (52) e Ourense (19). Entre os concellos con maior número de actuacións atópanse os de Vigo (24) e A Coruña (16), mentres que A Estrada e Pontevedra rexistraron 11 cada un e Bergondo, 9. Boiro, Ferrol e Lalín sumaron 8 incidencias por concello e Abegondo, Foz e Redondela, 6, entre moitos outros.

A maior parte das intervencións estiveron relacionadas con dificultades na circulación por mor de árbores e pólas caídas, con 188 casos. Tamén houbo actuacións para previr riscos (59) ou avisos por carteis ou sinais caídos (34). Tamén se rexistraron ata 30 alertas por restos de accidentes ou obxectos nas estradas e uns 22 avisos por cables de luz ou teléfono caídos.

Durante o martes mantívose activa a alerta laranxa costeira que, inicialmente, se limitaba ao litoral oeste da Coruña, pero que se estendeu ao suroeste provincial e a toda a costa pontevedresa. Ademais, houbo alerta laranxa por choivas no oeste e suroeste da Coruña e alerta amarela en distintas zonas da Comunidade tamén por precipitacións. Este mércores, todas as alertas por meteoroloxía adversa están desactivadas.