A Xunta publicou no Portal de Contratos Públicos de Galicia a licitación, por 1.461.459 euros, da ampliación da unidade de resonancia magnética do Complexo Hospitalario Universitario da Coruña.

Segundo informou o Goberno galego nun comunicado, de acordo co programa funcional previsto, o proxecto inclúe catro despachos de informes, unha sala de resonancia magnética, sala técnica, zona de recuperación, área de control, tres cabinas e aseos para o persoal sanitario e os pacientes.

O obxectivo é optimizar a funcionalidade asistencial, reducir os percorridos interiores, compatibilizar a nova unidade co funcionamento do hospital e resolver as condicións técnicas propias dunha sala de resonancia magnética.

As empresas teñen ata o 2 de novembro para presentar as súas ofertas.