Non decae a loita da ANPA do CEIP Prácticas por unha reforma integral no centro. A pesar das promesas en quente do Conselleiro durante unha visita hai agora un mes, as familias seguen sen ver novas oficiais. Ante esta situación convocaron esta tarde de mércores unha merenda colectiva na praza da Tolerancia (ao carón de Náutica, no barrio de San Roque) para demandar de novo “un colexio digno, seguro e en condicións para os nosos nenos e nenas”.
Un xeito divertido de recordar a todas as institucións da necesidade “urxente” dunha reforma que levamos anos reclamando polas penosas condicións do colexio. “O noso centro non pode agardar máis. Queremos algo máis que promesas”, demanda a ANPA, que “non se conforma” cos anuncios sen certificar documentalmente e que está especialmente atenta ao próximo proxecto de Orzamentos da Xunta para o 2027.
O acto serviu ademais informar as familias das últimas novidades. A propia ANPA, a semana pasada realizou unha xuntanza co arquitecto técnico que está facendo o proxecto de rehabilitación do centro, escoitando as necesidades reais das familias, e mesmo falando de prazos. “Pero fáltanos que se traduza ao papel”. O propio arquitecto recoñeceu que “hai que meter man en todo: tellados, chans, envolventes, humidades, filtracións, illamento térmico, carpinterías, portas, baños…”
“Parece que a intención é boa, pero necesitamos que haia unha partida orzamentaria nos Orzamentos de 2027 con nomes de apelidos para ter garantías”, deixan claro dende a ANPA, lembrando que ademais queren ver asinado o acordo entre Consellería, Concello e UDC. “Non imos deixar a mínima oportunidade”, avisan.
Máis novas sobre a situación das escolas
As familias da ANPA do CEIP Prácticas manteñen viva a loita por unha escola digna
