Continúa en marcha o FESTIGUAL. O ciclo organizado pola Fundación Emalcsa e o Concello da Coruña para visibilizar a arte e o talento dos colectivos singulares da cidade, encara unha nova fin de semana na súa décima edición, cunha ampla programación de teatro, música, cinema e actividades participativas que se estenderán por diferentes espazos da cidade, con propostas de acceso gratuíto.
Unha das principais citas será hoxe venres 13 de novembro, ás 20:30 horas, no Centro Ágora, coa representación de Soño dunha noite de verán, a cargo de Muxicas, o grupo de teatro da ONCE. A compañía levará ao escenario unha adaptación do clásico de Shakespeare que convida a descubrir a obra desde a diversidade e a escoita.
Tamén o venres, “K paparota Teatro” presentará Inverno na lavandaría no Fórum Metropolitano, cunha primeira función escolar e outra aberta ao público o sábado 14, ás 18:00 horas. Trátase dunha proposta poética e sensorial para crianzas a partir dos tres anos.
A programación familiar completarase con Artecendo comunidade en familia, un obradoiro artístico inclusivo da ONG ¿Por Qué No?, que terá lugar o venres, de 17:00 a 19:00 horas, no Fórum Metropolitano.
Da música á saúde: unha programación para todos os públicos
O sábado 14, de 12:00 a 18:00 horas, La Barra Bar acollerá unha mostra de DJ inclusivo, da man de Negus, que reunirá diferentes propostas musicais nun ambiente aberto á participación.
O cinema estará presente co ciclo Un plano diferente, que ofrecerá no Fórum Metropolitano varias proxeccións de 100 metros, de Marcel Barrena, o xoves 12 e venres 13 ás 20:00 horas, e o sábado 14 ás 17:30 e ás 20:00 horas.
A programación complétase coas VI Xornadas de Arte e Saúde, que se desenvolverán os días 12, 14 e 16 de novembro, con actividades no Museo de Belas Artes, no Hospital Marítimo de Oza e na Facultade de Ciencias da Saúde da UDC. Un encontro arredor do papel das artes na humanización sanitaria, a saúde comunitaria e a inclusión social.
FESTIGUAL continuará ata o 19 de novembro en diferentes espazos da Coruña. A programación completa, os horarios e as condicións de acceso están dispoñibles en www.festigual.gal
Uxía, Guadi Galego, A Banda da Loba, Corina Alfonso e Leti da Taberna abriron o telón do Festigual
