O Xulgado de Instrución número 6 da Coruña abriu dilixencias previas por un presunto delito de discriminación en relación coa agresión denunciada por Roberto Villaescusa, número tres da candidatura de Vox ao Congreso pola circunscrición coruñesa e membro do Comité Executivo Provincial da formación. Segundo informou Vox, os feitos producíronse mentres Villaescusa realizaba unha ruta informativa e repartía folletos na rúa. O xulgado incoou a causa e citou as testemuñas para esclarecer o sucedido.
De acordo coa denuncia presentada, a agresión tivo lugar o 29 de setembro, cando un individuo, que segundo a formación xa foi identificado, se achegou ao representante de Vox e o agrediu “dándolle unha forte labazada, arrincoulle os folletos que estaba repartindo e tirounos ao chan, ao tempo que profería insultos e ameazas”. A formación política denunciou que este tipo de actuacións constitúen “unha grave agresión á liberdade de expresión e ao dereito fundamental da cidadanía a facer política na rúa”.
Neste sentido, Vox manifestou a súa confianza en que a Xustiza “actúe con contundencia e depure as responsabilidades correspondentes”. Ademais, o partido considera “imprescindible” que “os agresores non queden impunes” e que se envíe unha mensaxe clara contra este tipo de comportamentos. “A violencia política, as coaccións e os insultos non poden normalizarse nunha democracia”, sostén a formación, que insiste en que “o simple feito de repartir información, explicar propostas e falar coa veciñanza non pode converterse en motivo de intimidación, insultos ou violencia”.

