Un home resultou ferido nunha pelexa entre varias persoas nun local da Coruña e tivo que ser trasladado ao hospital da cidade herculina, onde permanece estable e fóra de perigo. Segundo os primeiros datos recompilados pola Policía Nacional, as lesións foron causadas por unha pequena arma branca, aínda que se descoñece a tipoloxía.
Os feitos ocorreron arredor das 21.00 horas do sábado, 21 de novembro, nun establecemento da Ronda de Outeiro. Aínda non transcendeu cal foi o motivo que orixinou o conflito, que se saldou cunha única persoa ferida e trasladada ao Complexo Hospitalario Universitario da Coruña (Chuac).
A vítima está estable e fóra de perigo, segundo as fontes policiais consultadas. Polo momento, non se produciron detencións. A Policía Xudicial abriu unha investigación e trata de esclarecer o sucedido.

