A sección primeira da Audiencia Provincial da Coruña rexeitou revisar dúas penas impostas a dous condenados — a once e a sete anos de cárcere, respectivamente– por delitos sexuais ao entender que a nova lei do ‘só si é si’ non é máis beneficiosa. En ambos os casos eran parella das vítimas, un feito que, tal e como explica o tribunal, a actual regulación considera agravante.
Segundo informa o Tribunal Superior de Xustiza de Galicia (TSXG), nun dos procedementos, solicitou a revisión un condenado a once anos de cárcere por cometer un delito continuado de abuso sexual sobre a súa parella, menor de idade, concorrendo a circunstancia agravante de discriminación por razón de xénero.
O tribunal destaca no auto que é “evidente que a regulación actual non é máis beneficiosa para o reo”. Así, indica que a pena a impor por ese delito, segundo a redacción vixente cando sucederon os feitos, oscilaría entre os 8 e os 12 anos de prisión.
No entanto, destaca que, ao tratarse dun delito continuado, coa circunstancia agravante de discriminación por razón de xénero, a pena mínima sería de once anos. Coa nova lei, segundo os maxistrados, ao ser a vítima parella do autor dos feitos e tratándose dun delito continuado agravado pola discriminación por razón de xénero, “a pena mínima a impor sería de 11 anos e 3 meses a 12 anos”.
