Arrecendo cultural o que se viviu nesta xornada polos barrios da Coruña. Grupos percorrendo rúas esquecidas armados con mapas, recantos ocupados por improvisadas conversas, baixos cheos de vida… Éxito absoluto das xornadas de Estudios Abertos 2023, na que 38 artistas de toda a cidade abrían os seus estudios á cidadanía.
View this post on Instagram
Durante toda a xornada, zonas con alta densidade de artistas por metro cadrado como Monte Alto recibían a visita de ducias de grups interesados en ver por dentro como é o espazo de traballo dos artistas da cidade, e algúns tamén de comprar. A impresión é que as xornadas foron un éxito rotundo, dando conta que na cidade temos escultura, pintura, fotografía, ilustración, debuxo, cerámica e arte multidisciplinar de máxima calidade.
Explicaban as súas obras ante as preguntas das visitantes artistas como Daniel Remeseiro, que compartía espazo con outros compañeiros da “retagarda, que non da vangarda”, como Brais Remeseiro, Ana Barranco, Fernando Páez, Ignacio Pardo e J.R. Estévez, nun soto de Ángel Rebollo. Ao carón Jano Muñoz, o creador desta iniciativa que dende hai varios anos deixou o proxecto en mans municipais, compartía tamén o seu estudio con xentes como Borja Quintela.
Non cabía un alfinete no estudio de Óscar Cabanas a última hora da tarde na Atocha Baja, con esas rúas escuras tinguidas de vermello tan características. Raúl Álvarez sorteaba as ondas do mar ante a visita dos últimos inquisidores. Mentres o veterano artesán da madeira José Méndez daba conta das súas historias feitas madeira a antiguos compradores que querían repensar a obra que tiñan na súa casa.
Quedamos emprazados para o 2024 para poder coñecer algúns máis dos 38 artistas da cidade.
Máis info
—–
