O alcalde de Oleiros, Ángel García Seoane, volveu a mostrar o seu rexeitamento á proposta da Xunta dunha pasarela peonil entre a praia de Santa Cristina e a coruñesa de Oza. Mentres, a rexedora da Coruña, Inés Rey, insistiu en que descoñecen o proxecto.

Tras unha reunión co rexedor de Oleiros, e a preguntas dos xornalistas, asegurou que “nos oito meses que pasaron desde o anuncio da pasarela por parte da Xunta” non foron chamaqdos “para falar do asunto”.

“O colmo do absurdo é que agora nos ameacen con non executar algo que nin sequera se nos presentou“, dixo a alcaldesa, quen asegurou que descoñecen se existen estudos de impacto ambiental ou mobilidade. Ademais, reprochou á Xunta falta de diálogo.

Pola súa banda, o alcalde de Oleiros incidiu en que “desde o primeiro momento” rexeitou este proxecto, entre outras cuestións, pola afectación, explicou, na praia de Santa Cristina. “É unha obra agresiva, que estes oito millóns da Consellería –de Infraestruturas- sexan usados para obras de infraestrutura na comarca”.

Noutra orde de cousas, na reunión que ambos os representantes municipais mantiveron abordaron cuestións como a conexión por vía marítima de ambos os municipios ou estender a chegada da liña do bus 1-Á a zona de Santa Cristina, en Oleiros, todo o ano, e non só no verán.