A Comisión pola Recuperación da Memoria Histórica (CRMH) da Coruña presentou este venres, na sede da Agrupación Alexandre Bóveda, o documental ‘Camarada Fraga. Memoria dun fascista‘ que busca difundir a “cara B” do expresidente da Xunta.
Así o expuxo Manuel Monge, guionista dun documental cuxo traballo audiovisual estivo a cargo de Dani Carballada. Presentouse coincidindo co centenario do nacemento de Fraga.
Segundo os promotores, non se busca “xulgar” a traxectoria do expresidente da Xunta, pero si analizar o seu “papel como membro activo da ditadura franquista”, entre outros, lembran, como membro do Consello de Ministros desa etapa.
O documental aborda esta etapa pero tamén o seu papel como promotor de Alianza Popular e despois o PP, os seus “encomios” ao ditador, a súa opinión sobre Franco e o alzamento ou a súa intervención, como ministro de Información e Turismo, na censura e, en particular, a súa actuación coas obras en galego para abordar o seu papel con posterioridade xa en democracia.
“É un traballo educativo e divulgativo“, resumiu Monge, quen explicou que se exhibirá proximamente na cidade da Coruña e no resto de Galicia para difundir “a memoria histórica” e ofrecer a outra “cara B” de Fraga.
O presidente da CRMH, Fernando Souto, definiuno como “un franquista que defendía un réxime ditatorial“. En canto ao traballo presentado este venres, con presenza de presos e presas franquistas, entre eles o propio Monge, Suso Díaz, Nicanor Acosta ou Manuel Lourenzo, asegurou que busca dar a coñecer “todas as arestas” de Fraga.
