Que a Coruña é unha privilexiada en materia de transporte en bicicleta é evidente. O servizo de Bicicoruña é un verdadeiro luxo para unha cidade como a nosa. Máis de 3.000 persoas xa están rexistradas trala renovación do sistema realizada con fondos europeos .

Pero a realidade, como recoñece o colectivo pola mobilidade sostible Mobi-liza, hai veces que as estacións de bariio quedan baleiras.

As queixas por non atopar bicis nas horas de entrada e saída dos centros escolares e de traballo son numerosas, polo que sería necesario garantir reposición das bicis nas horas punta.

Así o entende o grupo da Marea Atlántica, que vai propoñer no pleno deste xoves que se aumente o persoal para poder garantir que haia bicis en todas as estacións, e mesmo que a app móbil informe informar de se hai ou non espazo. “Estes problemas dificultan o uso de Bicicoruña coma alternativa ao coche privado xusto onde sería máis necesario, nos barrios máis poboados e afastados do centro”, sinala o candidato Xan Xove.

Igualmente, aproveitarán para solicitar a instalación de máis estacións de Bicicoruña nos polígonos industriais e nos centros hospitalarios, lugares con moita afluencia de persoas aos que
non se pode chegar con este servizo.
Así mesmo, piden ampliar o tempo de uso das bicis, para facilitar os traxectos máis longos, e ampliar os horarios para, por exemplo, dar servizo ás xentes que entren antes das 8:00h da mañá.