Un microbús escolar da ruta Betanzos-Oleiros, nese momento sen nenos a bordo e só cun pasaxeiro adulto, e un turismo chocaron este venres nun accidente de circulación. No sinistro, o condutor do coche resultou ferido e tivo que ser excarcerado.
Esta persoa, tras ser liberado polos Bombeiros de Arteixo, foi evacuada ao Complexo Hospitalario Universitario da Coruña (Chuac) polos servizos de urxencias sanitairas. O accidente tivo lugar sobre as 17,15 horas no quilómetro 585,5 da N-6, no lugar de O Carballo. Varios particulares alertaron ao 112 do impacto entre o microbús e o turismo e, segundo relataron, o ocupante do turismo tiña dificultades para saír do vehículo.
O 112 Galicia puxo a situación en coñecemento de Urxencias Sanitarias de Galicia-061, Bombeiros de Arteixo, Servizo de Emerxencias de Oleiros, Policía Local e Garda Civil de Tráfico e avisou ao servizo de mantemento da estrada na que ocorreu o accidente. O autobús facía o traxecto entre Betanzos a Oleiros, despois de deixar un grupo de nenos nun colexio da primeira localidade.
COLISIÓN MÚLTIPLE
Doutra banda, en Vigo, no punto quilométrico 1,8 da VG-20, tres persoas foron trasladadas a un centro médico despois de que chocasen outros tantos vehículos.
Concretamente, a colisión múltiple produciuse ao fío das 15,30 horas e o 112 Galicia recibiu a alerta deste accidente, coa chamada dunha persoa particular. A Central de Coordinación de Emerxencias solicitou a intervención de Urxencias Sanitarias de Galicia-061, da Policía Local e da Garda Civil de Tráfico.
