A cidade da Coruña celebrará este fin de semana o 50 aniversario da morte de Pablo Picasso (o 8 de abril) cun amplo progama de actividades que inclúen exposicións, percorridos teatralizados e un programa de radio, entre outros.

Tanto o sábado como o domingo casa Museo Pablo Picasso desenvolverá novas sesións das visitas teatralizadas para lembrar a estancia na cidade herculina do pintor. A iniciativa, dentro do denominado proxecto VINTE, enmárcase dentro da celebración do Ano Picasso.

Promovido pola compañía teatral coruñesa Vos Náufragos Teatro, o proxecto propón recuperar para a cidadanía “a memoria do territorio habitado polo pequeno Picasso durante a súa estancia na Coruña”, intervindo por medio das artes escénicas un dos principais espazos que marcaron a súa vida na cidade: a vivenda familiar dos Ruiaz Picasso na Coruña, hoxe convertida na Casa Museo.

Os pases terán lugar o sábado 8 ás 17,00 e ás 19,00 horas; e o domingo 9 ás 11,00 e ás 13,00 horas. Todas as actividades son gratis e a inscrición pode facerse directamente no formulario:https://forms.gle/KrwexYRu7CAuWpf98 ou a través do correo electrónico osnaufragosteatro@gmail.com ou da conta en Instagram do proyecto@vinte.coruna As visitas teatralizadas repetiranse durante todo o ano con motivo de celebracións relacionadas co pintor, como o 20 de maio –Día internacional dos Museos–.

Ademais, o Concello promove tres exposicións que lle renden homenaxe ao pintor “desde diferentes perspectivas”. A primeira, ‘Abrindo a nosa colección’, pódese visitar na propia Casa Museo no horario habitual de 11,00 a 13,30 horas e das 18,00 ás 20,00 horas en días laborables e a partir das 12,00 horas en festivos e domingos.

A mostra recolle as obras creadas por outros artistas en 1980 por iniciativa do Partido Comunista para homenaxealo e entre eles figuran Pablo Serrano, Antonio Saura, Antoni Cravei, Juan Genovés, Lucio Muñoz, Rafael Canogar, Cristóbal Halfter, Federico Mompou, Vicente Aleixandre, Jorge Guillén, Gabriel Celaya, Rafael Alberti e Blas de Otero, que achegaron composicións orixinais. Tamén incorpora textos do poeta Eva Veiga, a profesora de Historia de Arte María Gil Martínez e o musicólogo Xoán Carreira.

‘EN PRETÉRITO SEGUINTE’ E ‘VILLALOBO’

A segunda exposición é ‘En Pretérito Seguinte’, unha mostra colectiva no Quiosco Alfonso de artistas contemporáneos coruñeses que achegan a súa visión sobre a cidade na que o pintor comezou a súa actividade artística. Lembran nun comunicado que A Coruña é unha das poucas cidades picassianas. Aquí viviu a súa adolescencia e “naceu” como artista, xa que foi na Coruña onde expuxo por primeira vez.

O seis artistas da exposición son Correa Corredoira, Manuel Suárez, Lara Pintos, Mico Rabuñal, Pilar Cancio e Samuel Castro, acompañados por textos de Yolanda Castaño. “Pretenden mostrarlle ao mundo a influencia da cidade sobre eles, as mesmas rúas, o mesmo mar e a mesma sociedade coruñesa que marcou a Picasso e que é determinante tamén nas súas creacións“, sinalan.

A terceira exposición, ‘Villalobo. O vento comezou de novo‘, recolle en Palexco preto dun centenar de obras realizadas entre 1970 e 2022 por Nelson Villalobo. Coa mostra, Villalobo reinterpreta a obra do pintor.

De forma paralela, continúa no Museo de Belas Artes a exposición ‘Picasso, branco no recordo azul’, na que colabora o Concello e que permite facer un percorrido polos anos de estancia de artista na cidade da Coruña.

Tamén este fin de semana levará a cabo na cidade herculina o programa de Radio Nacional de España ‘Non é un día calquera’, presentado pola xornalista Pepa Fernández. Será o sábado 8 e o domingo 9, das 8,30 ás 13,00 horas, con espazos monográficos dedicados á figura de Picasso e de maneira especial á súa estancia de neno na Coruña e a influencia que tivo no seu desenvolvemento artístico. O programa gravarase no Teatro Colón e estará aberto ao público.

NOVOS CÓDIGOS QR DA RUTA PICASSO

Doutra banda, o Concello colocou os novos paneis informativos en diferentes puntos da Ruta Picasso, con novos códigos QR e información actualizada sobre a etapa vital do pintor na cidade. A información, accesible a través dos códigos QR, está dispoñible en tres idiomas (galego, castelán e inglés) para que as persoas que visiten a cidade poidan coñecer máis sobre a vinculación de Picasso coa cidade.

Os folletos recollen a ruta picassiana, con puntos destacados como o IES Eusebio da Garda, lugar no que o artista recibiu formación escolar durante a súa etapa na cidade. Tamén outros enclaves como o edificio da rúa Real, no 20, onde Picasso realizou a súa primeira exposición en febreiro do 1895, ou a propia casa da rúa Payo Gómez, na que viviu coa súa familia e que foi reconvertida en casa Museo.

Nela poden verse diferentes reproducións da obra de Picasso na súa etapa coruñesa. Contén tamén un plano da cidade cos diferentes puntos da Coruña de Picasso, recollidos na lenda con información de cada un deles.

Os novos QR conteñen ademais outra información de interese, como a crítica sobre a primeira exposición de Picasso, recollida no Diario de Galicia, ou diferentes obras ou fragmentos das realizadas na cidade.

Entre elas destaca o óleo do seu can, Clíper, ou o ‘Retrato de ancián barbudo’, ambas as realizadas en 1895 xunto con ‘Don José Ruiz de perfil’ ou unha imaxe da praia do Orzán, lugar sinalado para o artista.

MINISTERIO DE CULTURA

O ministro de Cultura e Deporte, Miquel Iceta, defendeu este sábado conmemorar o 50 aniversario da morte de Pablo Picasso este ano profundando na súa vida e obra aínda que “sen esconder” as controversias acerca del.

En declaracións antes de realizar unha visita ao Museo Picasso de Barcelona xunto ao director, Emmanuel Guigon, referiuse ao pintor como “unha personalidade moi controvertida, moi atravesada polas súas paixóns”, características que segundo el serven para entender a súa obra.

“É verdade que a súa relación coas mulleres foi moitas veces moi controvertida e, se uno mira con atención á súa obra, xa ve que hai unha relación treboenta”, e engadiu textualmente que Picasso (1881-1973) tiña unha paixón desbordada, fóra do normal.

O GRAN PINTOR DO SÉCULO XX

Destacou que o Ano Picasso, que organiza conxuntamente o Goberno de España e o de Francia, pretende “coñecer mellor a Picasso con todas as súas contradicións e paixóns desatadas”, e definiuno como o gran pintor do século XX. O ministro eloxiou o compromiso do artista coa paz, a súa capacidade de innovación e o seu legado: “Temos un inmenso legado Picasso que fai seguramente que sexan falsas as polémicas de quen é Picasso”.

Esta celebración estenderase ” por varios continentes” con máis de 45 exposicións en países como Alemaña, Suíza, Bélxica, Estados Unidos, Mónaco e Romanía. En España conmemorarase nas “cidades picassianas”, que son a súa Málaga natal, Barcelona, Madrid e Coruña, e remarcou que tamén creou parte da súa obra en Horta de Sant Joan (Tarragona) e Gósol (Lleida).