Centos de persoas acodían esta pasada tarde de xoves á subdelegación do goberno para participar na concentración contra os desahucios a raíz do caso MariCarmen. Convocada polo Sindicato de Barrio Falperra / Os Mallos, e a Plataforma pola Vivenda da cidade, co apoio do sempre combativo Sindicato de Estudantes, a veciñanza quixo amosar o seu apoio á madrileña de 87 anos con arengas como “Nin casas sen xente, nin xente sin casas”, ou “O ático de Ayuso para Maricarmen”.
Os convocantes deixaron clara a necesidade de concentrarse porque “non é un caso illado”. Esixiron ás institucións públicas que “deixen de ser cómplices”. “Esiximos a paralización inmediata de todos os desafiuzamentos de persoas en situación de vulnerabilidade. O fin dos privilexios fiscais á especulación, a regulación efectiva e restritiva das vivendas turísticas, priorizando o uso residencial nos nosos barrios”, recolle o manifesto.
Pero tamén unha “fiscalidade progresiva en función do número de vivendas acumuladas, para que especular con fogares deixe de ser rendible. E a mobilización do parque de vivenda baleira en mans de bancos, fondos e inmobiliarias para uso público e social”.
”O rentismo non ten piedade, non ten memoria, non ten corazón. É unha lacra que nos está deixando na rúa, unha a unha, e non para”, sinalan criticando a deshumanización dos protocolos.
Máis novas
A Asociación Oza-Gaiteira-Os Castros reclama medidas eficaces contra os desafiuzamentos
Entregan unha vivenda á nai ucraína con catro fillos á que aprazaron un desafiuzamento na Coruña
