Continúa sen solución, malia as promesas municipais, e tras máis de 6 meses, a falta de profesorado no Conservatorio de música de Culleredo. De aí que as familias anuncien que volven coas mobilizacións, despois de facer entrega dun feixe de sinaturas recollidas para a esixir ao Concello que cubra as baixas.
“Malia os anuncios feitos polo concello, a situación só mudou no sentido de que unha profesora de baixa reincorporouse, pero non porque se lle puxera solución a unha eiva que vén prexudicando enormemente ao alumnado do conservatorio”, explican dende a ANPA.
Así, a ANPA retomará este mércores as concentracións ás 17:00 da tarde, diante do propio Conservatorio.
A ANPA desexa “agradecer o apoio de centos de veciños e veciñas que se teñen achegado ao centro e respaldado as concentracións”. E deixa claro que “o Conservatorio é un orgullo para este municipio e as familias e o alumnado só queren defendelo e defender o seu mantemento”.
Nesa liña teñen solicitado ao conxunto da Corporación o compromiso orzamentario e de xestión. “Nin siquera é un problema orzamentario; é un problema de xestionar e de axilizar os trámites. Só hai que ser áxiles e capaces na xestión”.
