Celebrouse este xoves un novo pleno no Concello da Coruña, o último deste mandato, polo que serviu para despedir aos e ás edís que xa non estarán na seguinte lexislatura.

Entre os puntos destacables, o pleno aprobou unha iniciativa que reducirá os tempos para a resolución de trámites burocráticos. A mesma está orientada a mellorar os servizos ofrecidos á cidadanía, ás empresas e ás demais institucións públicas, segundo o goberno local.
A normativa inclúe a implantación dunha rede de apoio á administración dixital e dá cobertura “a todas aquelas persoas que, por diversas causas, non usan os medios dixitais para a realización dos seus trámites”.

Non á municipalización do servizo de autobuses

O Partido Popular e o Partido Socialista votaron xuntos hoxe no Pleno do Concello da Coruña para rexeitar a moción da Marea Atlántica na que pedían a creación dunha empresa municipal cando, o 31 de decembro de 2024, remate a concesión do servizo de bus á Compañía de Tranvías.

Para a Marea pérdese unha “oportunidade para liderar, desde o público e sen atarse a unha empresa privada que busca só o beneficio e bloquea os cambios, para implantar na Coruña unha “mobilidade verde, fiable, intermodal e metropolitana”.

Pola aplicación da Lei de Vivenda na Coruña

Si resultou aprobada, aínda que co voto en contra do PP, a moción da Marea para aplicar as medidas da Lei de Vivenda na Coruña para baixar os alugueiros, declarando a cidade como zona tensionada. Todos os grupos comprometéronse a facelo agás o Partido Popular, que ten capacidade de vetala desde a Xunta.

PALAVEA

O pleno aprobou definitivamente e por unanimidade darlles un nome oficial a varias rúas de Palavea que aínda carecían del, e recuperando as denominacións da toponimia tradicional. Unha iniciativa da asociación veciñal, a partir do traballo do lingüista Iván Méndez, e con achegas da Asociación Sociocultural ‘Campo da Pena’.

Outros puntos

Noutra orde de cousas, o pleno municipal aprobou de forma inicial o regulamento de uso de sistemas de aeronaves tripuladas por control remoto por parte da Policía Local da Coruña.

Esta norma permitirá aos axentes o uso de drones para obter imaxes que “faciliten a toma de decisións para mellorar a seguridade cidadá en determinados eventos”.