ExpOtaku clausura este domingo na Coruña unha nova edición con ampla afluencia de público desde a súa apertura, o venres, e con especial asistencia na xornada deste sábado no recinto feiral da cidade herculina.
Seguidores do anime, os cómics, o kpop e o mundo dos videoxogos danse cita nun evento con 150 expositores, 80 postos de videoxogos e 260 actividades durante tres días. Os dobladores dos Simpsons son un dos pratos fortes desta edición ao estar este sábado no escenario principal e o domingo asinando autógrafos.
ExpoOtaku, que reúne en cada edición a uns 25.000 visitantes procedentes de Galicia, doutros lugares de España e de Portugal, inclúe propostas como unha ludoteca con máis de 50 títulos ata un trivial otaku, sen esquecer os concursos, con certame de Cosplay, concurso de karaoke e dance cover, con repartición de premios.
Como ilustradora invitada acode Shaun Elay nun evento no que se dan cita distintas propostas nas múltiples casetas que abarcan o recinto feiral e con ilustradores e creadores españois que achegan ao público os seus traballos. Hai tamén talleres, desde a creación de gatitos origami a pinzas do pelo, pendentes e todo tipo de bonecos e peluches, ademais de receitas de cociña.
