O alcalde de Oleiros, Anxo García Seoane, volveu a obter, aos seus 71 anos, unha nova maioría absoluta neste municipio coruñés, o de maior riqueza por habitante de Galicia. En concreto, mantén a súa maioría absoluta con Alternativa dos Veciños, partido que formou e que, como nos anteriores comicios, volveu a concorrer nestas eleccións municipais en distintos municipios da área coruñesa, con mellores ou peores resultados.

Fronte aos seus 13 edís, as demais formacións mantéñense igual ou con lixeiros incrementos. Este é o caso do PP que sobe de catro a cinco edís. Mentres, o PSOE mantense en dous e o BNG, nun. Anxo García Seoane, que se define como castrista e en cuxo municipio hai unha estatua dedicada ao Che Guevara, é alcalde desde 1985, aínda que cun parón, por unha inhabilitación de seis anos entre 1996 e 2003, etapa na que foi substituído á fronte da alcaldía por Esther Pita.

OUTROS CONCELLOS

Na comarca, destaca, mentres, a perda de maioría absoluta dos socialistas en Culleredo, con José Ramón Rioboo como candidato á reelección, fronte á que obtén de novo o alcalde e candidato do PP en Arteixo, Carlos Calvelo, que logra a súa cuarta maioría. En Cambre, volveu gañar Unión por Cambre aínda que pasou de oito a sete edís. Precisará de pactos para gobernar.

En Sada, onde Benito Portela, perdeu a alcaldía por unha moción de censura con apoio de exediles do PP, PSOE e Alternativa dos Veciños, a formación que encabezaba, Sadamaioría, obtivo a maior representación, con sete edís, un máis que nos anteriores comicios, aínda que necesitaría o apoio de socialistas e nacionalistas para gobernar.