A Asemblea Local do BNG reúnese este mércores para avaliar os resultados electorais e o escenario xurdido do 28M. Pero uns dos grandes triunfadores dos comicios teñen claro a quen lle toca mover ficha. “Quen ten que dar o primeiro paso é o PSOE. Inés Rey é quen necesita os votos do BNG para ser investida alcaldesa”, sinalou hoxe o seu candidato Francisco Jorquera.
A premisa da que parte o BNG para establecer esas conversas co PSOE é a plena disposición a que “a maioría progresista que se expresou nas urnas teña reflexo na escolla da Alcaldía”. Mais ao mesmo tempo, enfatiza, ao BNG “non lle valen catro anos máis do mesmo”. “Hai moitas cousas por corrixir e moitas cousas por mellorar”, sinalou pensando no pleno de investidura do vindeiro sábado 17 de xuño.
