Máis de 3 semanas despois do brote de gastroentrerite, e mentres a veciñanza de Betanzos segue sen poder beber auga da rede, chegan novos resultados das analíticas encargadas pola empresa concesionaria da rede de abastecemento de auga de Betanzos. Unhas analíticas recollidas “durante a noite do pasado día 13 e a mañá do 14 cando se produciu a última vertedura detectada ao río Mendo”, que confirmaron a presenza de “restos fecais, de orixe humana, con presenza de Novovirus”, en augas do río Mendo, o “mesmo virus que ocasionou o brote de gastroenterite e polo que a auga da rede de abastecemento segue sendo non apta para o consumo”.

En consecuencia, os resultados destas análises elaboradas polos laboratorios ‘Labaqua’ serán achegados á denuncia que presentará o Concello no xulgado para que se investigue “a vertedura que foi detectada polos servizos de control e seguimento de Viaqua na zona de captación de auga”.

Así mesmo, o consistorio está á espera de que Augas de Galicia, que tamén recolleu mostras ese día, “informe sobre os resultados das súas análises”. “Entendemos que non variarán dos realizados polos laboratorios que fixeron a analítica para Viaqua”, puntualiza.

A CONSELLERÍA DE SANIDADE SEGUE BUSCANDO…

Pola súa banda, o conselleiro de Sanidade, Xullo García Comesaña, dixo que a Xunta descoñece a orixe do brote de gastroenterite e continúa realizando as “medidas correspondentes” para determinar se a auga é apta.

A preguntas dos xornalistas sobre este asunto nun acto na Coruña, García Comesaña explicou que o Goberno autonómico continúa facendo análise de auga “na rede –de abastecemento– e no río” para darlle “recomendacións e instrucións ao Concello na súa competencia de subministración de auga”.

O titular de Sanidade quixo transmitir aos veciños de Betanzos que “a Xunta ata o momento que teña a seguridade de que a auga está en condicións adecuadas dirá o contrario”.