Un neno de 10 anos foi ferido, cunha fractura nunha perna, nun atropelo ocorrido na noite do sábado na Coruña, na Avenida das Conchiñas. O menor permanece ingresado de forma estable no Hospital Materno Infantil, segundo informa o 061.

Un particular alertou ao 112 Galicia, preto das 21.00 horas, de que había un neno ferido por este suceso, aínda que estaba consciente. O incidente ocorreu á altura do número 13, onde se atopa a saída do aparcadoiro e xunto a un parque infantil.

A central de emerxencias trasladou o aviso aos Bombeiros da Coruña, á Policía Local, a Proteccion Civil e ao persoal do 061. En base ao relato do persoal sanitario, unha ambulancia trasladou ao menor ao centro hospitalario cunha fractura de perna. Alí foi intervido e, actualmente, segue ingresado, pero sen complicacións.