A Coruña acollerá este venres, ás 21,30 horas desde a praza de María Pita, unha nova edición do ‘Friday Mobility Night’ cun itinerario circular de 18 quilómetros que percorrerá a cidade.
Segundo informou o Concello, esta cita está organizada por Galicia Rollers e as persoas interesadas en participar deberán vestir pezas de diferentes cores, roupa flúor, lentes de cor, accesorios rechamantes e mesmo luces de cores.
Así, esta nova edición, que terá lugar un venres de cada mes, volverá contar cun grupo de voluntarios que se encargarán de guiar a marcha conxunta. Ademais de axentes da Policía Local e voluntarios de Protección Civil.
A ruta sairá e chegará á praza de María Pita, a dificultade é media e terá unha duración aproximada de dúas horas, transcorrendo maioritariamente por carril bici e carril 30.
Para participar é necesario asistir en patíns, bicicleta, monopatín ou calquera outro medio ou vehículo de mobilidade persoal non contaminante. A inscrición é gratuíta e pode realizarse na páxina web de Galicia Rollers.
