O incendio que se rexistrou este mércores pola tarde na parroquia de Suevos, en Arteixo, mantense estabilizado, e cunhas vinte hectáreas de superficie afectada, segundo as estimacións da Xunta.

A estabilización do lume, que se iniciou ás 17,07, produciuse a última hora, sobre as doce e media da noite. No lugar, segundo informaron a Europa Press desde a Consellería do Medio Rural, permanecen medios de terra e, se fosen necesarios, incorporaríanse aéreos. “Que parece que non vai ser necesario”, apuntaron desde o departamento autonómico, que engadiron que hai que esperar a dar “un tempo razoable” para dar por controlado o incendio.

Pola súa banda, os Bombeiros de Arteixo estiveron a protexer as vivendas próximas ao lugar do incendio, en concreto desde as sete da tarde ata as 23,30 horas, na zona da travesía de Suevos, e logo na zona de Cabo Cociñadoiro, desde a unha e media ata o cinco e media da madrugada.

Trátase do segundo incendio que se produce na zona nos últimos días. E é que a parroquia de Suevos xa sufrira outro incendio forestal o pasado sábado, que queimou unha superficie reducida. Para o seu control, mobilizáronse dous técnicos de apoio, sete axentes, dez brigadas, nove motobombas, cinco helicópteros e dous avións. O vento dificultou os traballos dos efectivos durante os traballos.