O consello de administración da Autoridade Portuaria da Coruña aprobou este martes a licitación da rede ferroviaria interior do porto exterior de Punta Langosteira, cun orzamento de 27,5 millóns de euros que serán financiados con cargo aos fondos Next Generation, segundo informa. Tras o visto e prace do consello de administración, a licitación publicarase de forma inmediata. As empresas terán un mes para presentar as súas ofertas e o prazo máximo de execución das obras é de 23 meses.
“Desta forma, os traballos comezarán no primeiro semestre de 2024 e concluirán antes do verán de 2026, cando se prevé que termine tamén a construción da ligazón que conecta coa rede xeral, que está actualmente en execución”, explica o organismo portuario. O proxecto consta dun trazado de catro vías que se separan por pares a ambos os dous lados do viario principal de acceso de vehículos ao porto. Complétase cunha prolongación na zona máis próxima ao dique de abrigo do porto e cunha plataforma ferroviaria de tres vías, como área de apoio para os traballos de composición e descomposición dos convois.
