O Consello da Xunta deu luz verde á declaración como iniciativa empresarial prioritaria dunha planta de produción de proteínas de orixe vexetal no municipio de Curtis, a cal vai impulsar a empresa sevillana Proteins for All, unha start up creada en 2022 cuxos socios xa puxeron en marcha unha empresa biotecnolóxica de éxito en Estados Unidos. O proxecto promove un investimento de 16,9 millóns de euros.
Esta iniciativa foi explicada polo presidente galego, Alfonso Rueda, ao termo da reunión semanal do seu goberno. Con este proxecto, a promotora pretende construír a primeira planta integral de produción de proteínas vexetais en España para nutrir de forma inclusiva e global produtos e ingredientes de orixe vexetal de alta calidade, sustentables e saudables a toda a industria agroalimentaria.
Para iso, desenvolverá un sistema de produción híbrido onde se combina a extracción da seca de proteínas concentradas ao 50 por cento a partir de sementes ou fariñas de legumes e un procedemento húmido posterior para transformar estas proteínas concentradas en proteínas illadas e purificadas e en proteínas funcionais. Segundo explica a Xunta, esta opción é máis sustentable e respectuosa co ambiente, xa que non require o uso de disolventes químicos prexudiciais para a saúde humana. Con esta iniciativa, xa son 21 as declaradas prioritarias.
REINSERCIÓN LABORAL DE 303 PERSOAS DESPEDIDAS DE ALU IBÉRICA
Doutra banda, o Goberno galego asinará outros tres acordos que supoñen unha inxección de 14,1 millóns de euros por parte do Goberno galego nos anos 2023 e 2024, para impulsar o Plan galego de financiamento universitario, creado para unificar os esforzos impulsados neste ámbito. Desta maneira, consolidarase un investimento de 54 millóns de euros en accións estratéxicas de I+D+i nas universidades públicas.
Ademais, o Consello informou sobre a firma do convenio de colaboración entre a Consellería de Promoción do Emprego e as organizacións sindicais e empresariais (Asime, UGT, CC OO Galicia e a Federación de Industria de CIG) para a posta en marcha do proxecto FEAG-Empregal, co que se persegue a reinserción laboral efectiva, no horizonte de 2025, das 303 persoas afectadas os despedimentos da planta coruñesa de Alu Ibérica (cunha media de idade de 43 anos).
Sen deixar este ámbito, o Goberno autonómico realizará máis de 1.500 actividades de formación para persoas desempregadas coa previsión de alcanzar os 24.000 beneficiarios nunha convocatoria, a de 2023-2024 que incrementa o seu orzamento nun 8,5 por cento e supera os 70 millóns de euros.
Na reunión deste xoves, tamén se analizou o informe da Consellería de Medio Rural sobre a resolución de dúas liñas de axudas xestionadas pola Axencia Galega de Industria Forestal, que buscan mellorar a competitividade da industria forestal galega. Así, aprobáronse 150 expedientes de axuda, por importe total de case 16,5 millóns de euros, o que suporá un investimento público-privada mobilizado de 48 millóns de euros.
INVESTIMENTOS OURENSE
A Xunta tamén concedeu unha achega de 86.000 euros para adquirir e rehabilitar un inmoble como local social no núcleo rural da Caridade, en Monterrei. Nesta mesma provincia, aprobouse a humanización da zona para voo libre con parapente do concello ourensán de Baltar, cunha achega de máis de 48.000 euros. Esta iniciativa está enmarcada en proxectos singulares da Axencia Galega de Desenvolvemento Rural.
