A xuíza do Xulgado número 1 da Corte Rexional de Manila acordou o traslado ao cárcere municipal da capital de Filipinas dos tres policías acusados da morte do coruñés Diego Bello, na illa de Siargao, na madrugada do 8 de xaneiro de 2020.

O capitán Vicente Panuelos, e os sarxentos Nido Boy Esmeralda e Roel Pazo Azarcon, que permanecían arrestados na sede da Policía Nacional de Filipinas, Camp Crane, “compartirán espazo a partir de agora con presos comúns, na que está considerada unha dos cárceres máis súper poboadas do mundo”, afirma a Plataforma ‘Xustiza para Diego’.

A portavoz da plataforma, Rebeca Díaz, trasladou a satisfacción pola decisión da xuíza, que asumiu a causa hai apenas un mes. “Foi absolutamente sensible a esta petición de traslado que se solicitou desde a detención dos acusados do asasinato de Diego”, engade. Ademais asegura que confía en que todo o proceso siga na mesma dirección e “que desde hoxe os acusados empecen a sentir que cae sobre eles todo o peso da lei”.