O 4 de novembro serán as Eleccións á Universidade da Coruña (UDC), e o catedrático de Estatística Ricardo Cao presentou a súa candidatura a reitor no proceso electoral. Fíxoo demandando máis financiamento ás administracións públicas.
Destacou, ademais, como eixos fundamentais do seu proxecto “intensificar” a participación da comunidade universitaria, “planificar” a substitución xeracional e “captar e reter” talento.
Así o manifestou na presentación oficial da súa candidatura celebrada este luns na Facultade de Informática da UDC. O seu obxectivo como reitor, segundo explicou, é conseguir unha universidade pública “de calidade, adecuadamente financiada”, así como “enraizada” na cultura galega pero “aberta ao mundo”.
O seu proxecto, impulsado desde o colectivo Nova Loce, o mesmo que no seu día promoveu a candidatura do actual reitor, Xullo Abalde, ten como “leitmotiv” a igualdade no impulso de oportunidades e a atención á diversidade “coa implicación de toda a comunidade universitaria man con man”. “A UDC debe ser integradora, solidaria, inclusiva, igualitaria e redistributiva”.
AMEAZAS
Respecto das “ameazas” coas que se enfronta a UDC nestes momentos, o recente Premio Nacional de Estatística destacou que “unha parte importante do seu persoal en poucos anos vaise xubilar”. “Temos que facer unha análise detallado e programar a substitución xeracional”, incidiu.
En canto ao financiamento, dixo que é unha das “patas indispensables para poder pór en marcha moitas das cousas da propia LOSU”, a nova Lei Orgánica do Sistema Universitario que establece un incremento do financiamento de ata un 1% en 2030.
“O plan de financiamento actual das universidades galegas ten un problema importante”, denunciou e recalcou a necesidade de ser “insistentes” nas demandas ás administracións públicas, “en concreto á Xunta de Galicia”, de aumento económico.
EQUIPO DE GOBERNO
No acto, o catedrático de Matemáticas estivo acompañado das persoas que conformarán a súa proposta de goberno se gaña as eleccións a reitor da UDC que se celebrarán o 4 de decembro. O seu mandato comezaría en xaneiro de 2024 e duraría seis anos.
Trátase dun equipo de sete profesoras e tres profesores de diferentes ámbitos científicos, do cal Cao resaltou o seu “equilibrio entre experiencia e mocidade”, así como as súas recoñecidas traxectorias académicas, investigadoras e de xestión.
Entre elas, atópanse os docentes Moisés Canle, Anxo Castro e Ana Ares. Cao tamén engadiu que por primeira vez, a igualdade e a diversidade, contarían cunha vicerrectoría en entidade propia.
