A Garda Civil detivo ao presunto autor de múltiples furtos de polbo conxelado e conservas de alto valor en diversos supermercados do municipio coruñés de Oleiros. O valor dos produtos subtraídos superan os 1.000 euros.

Esta investigación, que se iniciou en febreiro por mor de diferentes denuncias, derivou na detención do home nun coñecido supermercado da localidade de Oleiros, onde o individuo foi detectado no momento de cometer un dos furtos.

O individuo tiña un modus operandi recorrente: o autor accedía aos establecementos cunha bolsa na que introducía os produtos subtraídos, principalmente polbo conxelado e conservas de elevado custo. O detido, que xa conta cun amplo historial de antecedentes por feitos similares na localidade da Coruña, foi posto a disposición xudicial.

A Garda Civil mantén aberta a investigación para determinar o posible destino dos produtos furtados, de forma que non se descarta que poidan tratarse de encargos realizados por terceiras persoas.