Nova xornada chea de emotividade no marco do proxecto Entre Patios. Esa iniciativa que trata de humanizar os patios dos coles da Coruña con mesas realizadas por persoas privadas de liberdade da prisión de Teixeiro, no que colabora o alumnado do módulo de carpintería do IES Rosalía Mera, e no que están implicando como os que máis, os usuari@s do Centro de Educación Especial Aspronaga.
Durante a xornada de onte, internos do Centros de Inserción Social da Coruña colaboraron co alumnado do FP e de Aspronaga na montaxe de mesas para o patio en tres Centros Educativos de A Coruña (CEIP Torre de Hércules, CEIP Victor López Seoane e IES Zalaeta). As mesas xa se instalaron noutros dous centros dos 10 participantes (hai lista de espera!)
É unha delicia ver traballar en común colectivos tan diferentes, que se axudan entre si e se involucran ao máximo nestas xornadas que fomentan o traballo en rede, e a inserción das persoas privadas de liberdade, que coñecen así outros colectivos sociais, e viven en primeira persoa o que significa axudar á sociedade.
