Fiscalía e acusación particular rebaixaron a solicitude de condena para un home acusado de delitos de malos tratos no ámbito familiar, coaccións, inxurias, malos tratos habituais e intento de homicidio, coas agravantes de parentesco, de xénero e abuso de superioridade tras recoñecer os feitos, no xuízo fixado para este luns na Audiencia da Coruña.

Por eles, Fiscalía pedía, inicialmente, penas que sumaban 16 anos e oito meses de cárcere. Con todo, o procesado admitiuse culpable, ademais de alegar consumo de alcol e cocaína. O día da agresión á súa muller cun coitelo sostivo que consumira esta última sustancia. Pola súa banda, a vítima explicou que ese día o home estaba “ben pasado e ben mareado”, ademais de ratificar o consumo de alcol e drogas e de discusións frecuentes. Fiscalía e acusación rebaixaron a once anos coa condición de que cumpra cinco e a súa posterior expulsión do territorio nacional.

FEITOS

No seu escrito de cualificación, sostén que o home, condenado por un delito de lesións á súa parella en 2009, chegou a casar con ela en 2016, sucedéndose os episodios violentos, en ocasións estando as dúas fillas do matrimonio en casa, situada na Coruña. “O comportamento do esposo respecto da súa muller foi empeorando progresivamente pois a facía obxecto dun control exhaustivo respecto dos seus horarios de traballo como empregada de fogar ou en relación con outras saídas dela do domicilio, requiríndoa para que o tivese ao corrente do lugar no que se achaba a cada momento e facendo así a convivencia insoportable para ela”.

Indica tamén que a muller “decidiu separarse, pero o acusado resistiuse a abandonar a vivenda e, progresivamente, a súa conduta foise tornando máis violenta, posto que considerou inaceptable que fose a muller, polo mero feito de selo, quen puxese fin á convivencia”.

Fiscalía relata distintas episodios de violencia en 2022, que a muller non chegou a denunciar, e afirma que, nunha ocasión, ao decatarse do bar no que a vítima estaba cunha amiga, e cando xa se había ido da vivenda que compartían, “disposto a acabar coa vida da súa esposa, proveuse dun coitelo”.

“E xunto coa nena — unha das súas fillas–, dirixiuse ao establecemento”. Alí atacou á esposa, aínda que explica que a rápida intervención duns clientes “impediu que lograse o seu obxectivo”, en relación a unha agresión que acompañou con insultos. Posteriormente, foi detido.