O xuízo a oito persoas por tráfico de drogas en varios puntos da cidade herculina quedou suspendido este martes na Audiencia Provincial da Coruña pola folga de avogados de oficio. Para a súa celebración fixáronse tres días pero, finalmente, tivo que ser cancelado. Para os acusados, Fiscalía solicita penas de entre catro a seis anos de cárcere para os distintos imputados.
Segundo recolle o escrito do Ministerio Público, os feitos desenvolvéronse entre 2014 e 2016 despois de que a Policía Nacional realizase un dispositivo de vixilancia por mor de informacións veciñais. Coa investigación puideron interceptar a varios compradores da sustancia estupefaciente, así como ao home que abastecía á parella que vendía a droga desde un piso localizado en Novo Mesoiro.
Así, a un dos acusados, con numerosos antecedentes penais xa cancelados, realizábanlle os pedidos de cocaína por teléfono cunha chamada ou ben a través de mensaxes de texto para os que utilizaban unha xerga específica para non ser descubertos, por exemplo ‘pekes’ para referirse a a cocaína. Ademais da parella que realizaba a venda dos estupefacientes desde o inmoble, a organización operaba e distribuían a droga desde outros puntos como eran aparcadoiros de centros comerciais, da Torre de Hércules ou do polígono de Pocomaco.
Para todos eles, a Fiscalía solicita penas que van desde o catro ao seis anos de prisión. Sete deles enfróntanse a multas de máis de 8.370 euros e para o outro acusado unha de máis de 5.580 euros.