Un home faleceu este luns na Coruña por disparos nunha actuación policial a cargo da Policía Nacional, segundo informaron fontes próximas ao caso consultadas por Europa Press.

De acordo coa información facilitada, houbo unha actuación por parte de axentes do Corpo Nacional de Policía debido a altercados previos protagonizados polo home, de 35 anos. No enfrontamento cos axentes do dispositivo desprazado ao lugar, precisaron fontes consultadas, tería tentado agredir a un policía cunha barra de ferro.

Os feitos producíronse no polígono da Grela antes das 10,30 horas, ao redor do dez da mañá e, como consecuencia dos disparos da Policía Nacional, o home faleceu.

Sobre o sucedido, fontes próximas indicaron que se trata dun home de orixe cubana, “moi agresivo”, e que estaba a romper cristais de coches na zona da Grela. Por estes feitos, desprazáronse os axentes que tentaron paralo coa pistola eléctrica taser, o que non funcionou, segundo precisaron, debido a que o home levaba moita roupa.

Durante o enfrontamento, un dos axentes, que se atopaba xa no chan, efectuou o disparo que ocasionaría a morte ao home, “un delincuente”, precisan desde o Sindicato Unificado de Policía en redes sociais sobre os antecedentes delituosos do falecido. O sindicato ofrece, ademais, ao seu compañeiro apoio xurídico e psicolóxico.