A apenas uns meses da nova licitación do contrato do transporte público da cidade da Coruña, vense de inaugurar unha exposición na Sala Municipal de Exposicións Salvador de Madariaga, na rúa Durán Loriga, co título ‘Compañía de Tranvías. 120 anos ao servizo da Coruña’.

A mostra leva a cabo un completo percorrido pola historia da empresa, desde os tempos do tranvía clásico á actualidade. Nela pódense atopar preto dun cento de imaxes, así como diversos obxectos de gran relevancia como un antigo surtidor dos anos 30, tornos de entrada dos anos 60 ou carteis informativos de distintos períodos.

As verbas da alcaldesa Inés Rey amosaron a disponibilidade municipal de cara ao vindeiro concurso: “A mobilidade sostible e o transporte colectivo serán uns dos grandes retos do vindeiro 2024 para a cidade e a Compañía de Tranvías formará parte del como un axente de gran relevancia”.

O acceso á mostra estará aberto á cidadanía ata o vindeiro 2 de marzo.