O candidato do PSdeG á Presidencia da Xunta, José Ramón Gómez Besteiro, anunciou o inicio da escavación do túnel máis longo de acceso ferroviario ao porto exterior da Coruña. “Os socialistas seguimos traballando para conseguir unha Galicia máis competitiva”, destacou Besteiro sobre esta obra que custa 123 millóns de euros e que “é clave” para o tráfico de mercadorías no Eixo Atlántico.
Nun comunicado remitido aos medios tras reunirse en Madrid co ministro de Transportes, Mobilidade e Axenda Urbana, Óscar Puente, Besteiro sinalou que “mentres Rueda dedícase á confrontación”, os socialistas “seguen empuxando a favor”. O candidato dos socialistas galegos á Presidencia da Xunta sinalou que os 3,7 quilómetros de lonxitude do túnel 1 convérteno no máis longo dos tres que integran o novo trazado e mais do 55 % do percorrido total.
O tamén presidente da Comisión de Transportes do Congreso resaltou que este novo fito súmase á recente finalización da escavación do túnel 2 (de 746 metros), o máis próximo ao porto, que xa se utiliza para o tránsito de camións e maquinaria de obra, evita o tráfico de vehículos pesados polas zonas urbanas máis próximas e “acurta as distancias de transporte e reduce a pegada de carbono da obra”.
En paralelo, explicou Besteiro, na zona de Suevos, e tras finalizar e pór en servizo o paso superior da estrada CP 0503, continúa a execución de elementos da traza ferroviaria e as instalacións auxiliares asociadas aos inminentes traballos de escavación do túnel 1 desde o seu emboquille 2.
Xunto á obra civil de plataforma (movementos de terras, drenaxes, estruturas, túneles, integración ambiental, etc.) a actuación contempla a execución da superestructura de vía; as instalacións de autoprotección do túnel; as de seguridade e comunicacións; e os edificios de control técnico.
ACCESO FERROVIARIO AO PORTO EXTERIOR
O acceso ferroviario ao Porto Exterior da Coruña (6,7 quilómetros) conectará as instalacións de Punta Langosteira co Eixo Atlántico en servizo. Unha infraestrutura que discorrerá en túnel na súa maior parte (tres túneles e tres galerías de evacuación, con 5,3 quilómetros) cunha vía única en ancho ibérico, na súa primeira fase, prevéndose a súa adaptación posterior ao ancho estándar coa montaxe sobre travesa polivalente. O deseño proposto, así mesmo, é compatible coa futura electrificación deste acceso.
A actuación responde os acordos establecidos no convenio asinado entre o Mitma, Adif AV/AV, Portos do Estado e a Autoridade Portuaria da Coruña (APAC), polos que Adif AV/AV licita e executa as obras promovidas pola APAC. A nova infraestrutura ferroviaria incorpórase á rede ferroviaria, asumindo a APAC a súa titularidade e administración. O proxecto é financiado na súa totalidade co Mecanismo de Reconstrución e Resilencia (MRR) da Unión Europea (Next Generation EU), con fondos que serán asignados á Autoridade Portuaria da Coruña (APAC).
