Xa está listo o programa da II Mostra Cinema por Mulleres A Coruña. Un festival que se desenvolverá do 22 de febreiro ao 9 de marzo en Los Cantones Cines, cunha variada selección das máis recentes longametraxes nacionais e internacionais dirixidas por mulleres.
A mostra estará composta por unha selección de 10 longametraxes internacionais e 10 nacionais dirixidas por mulleres e realizadas entre 2022 e 2023, que proveñen de países tan variados como Lituania, Bélxica, Francia, Marrocos, Reino Unido, Corea do Sur, Canadá, Grecia, México, Alemaña, Israel, Países Baixos, Chile, Suecia e, obviamente, España. Destas 20 longametraxes, a metade serán estreas absolutas para o público coruñés: 6 internacionais e 4 españois.
Entre elas, atópanse longametraxes con múltiples premios en festivais internacionais como ‘How to have Sex’ da directora británica Molly Manning Walker –gañadora de Premio a Mellor Película 2023 do VI Festival Cine por Mujeres Madrid, ademais de Premio do xurado novo e Premio a Mellor Directora Novel de Valladolid-SEMINCI, Premio Un certain regard do Festival e Cannes e premio European Discovery- Prix Fipresci na European Film Academy, entre outros-, e ‘O corno’ de Jaione Camborda, gañadora da Cuncha de Ouro en San Sebastián. A dita directora presentará o pase da súa película en Los Cantones Cines e manterá un coloquio posterior co público.
Mesas redonda
Como novidade, esta edición comezará cunha mesa redonda (xoves 22 de febreiro ás 19.00 horas no Teatro Colón), moderada por Chelo Loureiro (Ferrol, directora e produtora de cinema), que terá lugar o día 22 de febreiro no Teatro Colón da Coruña. Nela participarán relevantes directoras de cinema como Ángeles Huerta (A Coruña); Jaione Camborda (San Sebastián-Santiago de Compostela); Olga Osorio (Lugo) e Paula Cons (A Coruña).
Programa
Entradas
As entradas terán un prezo de 4,5 euros (3 euros con desconto para desempregados, maiores de 65, familias numerosas e posuidores do carné xove) e haberá dous pases diarios ás 18.00 e ás 20.30 horas. Todas as películas serán proxectadas en versión orixinal con subtítulos.
