Por outra banda, a Universidade da Coruña (UDC) participa nun proxecto europeo que medirá os riscos en ecosistemas degradados. A iniciativa ZOE — procedente das siglas en inglés Zoonoses Emergence across Degraded and Restored Forest Ecosystems– estudará as zoonosis, definidas pola Organización Mundial da Saúde como aquelas enfermidades que se transmiten de forma natural dos animais vertebrados ao ser humano e viceversa.
O enfoque da UDC, segundo informa a institución educativa, permitirá avaliar o estado de coñecemento científico sobre os factores sociais, culturais e de conduta que conectan coa degradación dos devanditos ecosistemas.
O proxecto investigará como a degradación dos ecosistemas, a perda de biodiversidade e certos comportamentos humanos poden facilitar a aparición e propagación de enfermidades zoonóticas. Este estudo está formado por un consorcio interdisciplinar de sete países da Unión Europea e catro de América Latina. En concreto, o equipo da UDC está liderado pola profesora Adina Dumitru.
