Un centenar de persoas reuniuse este venres nun hotel da Coruña para render homenaxe ao maxistrado do Tribunal Superior de Xustiza (TSXG), Benigno López Gónzález, con motivo da súa xubilación, nun acto no que puxeron en valor a súa traxectoria e valía profesional.

Nesta homenaxe, o presidente do TSXG, José María Gómez e Díaz-Castroverde, recalcou que Benigno López “é un xuíz vocacional” que gozou co seu traballo e “dedicou toda a súa vida ao dereito e aos demais”. Ademais, anunciou que, en recoñecemento á súa traxectoria, o pleno da Sala de Goberno do alto tribunal galego pedirá ao Ministerio de Xustiza que lle conceda a Cruz de San Raimundo de Peñafort.

Benigno López (A Coruña, 1952) licenciouse en Dereito pola Universidade de Santiago en 1974 e, catro anos despois, tomou posesión do seu primeiro destino como xuíz, no xulgado único de Corcubión. Posteriormente pasou polo xulgado de Carballo, polo xulgado de Instrución 5 de Bilbao, o xulgado de Primeira Instancia e Instrución número 2 de Ourense e o Xulgado de Vixilancia Penal único de Galicia.

En outubro de 1988 incorporouse como maxistrado da Audiencia Territorial da Coruña, e en 1989 tomou posesión como maxistrado da sección primeira da Audiencia Provincial da Coruña, onde estivo ata decembro de 1995, momento en que foi nomeado maxistrado da sección primeira da sala do Contencioso-Administrativo do TSXG, onde permanecerá ata a súa xubilación, a próxima semana.

Entre xullo de 2007 e maio de 2012 exerceu como Valedor do Pobo, cargo do que presentou a súa renuncia tras unhas polémicas manifestacións nas que expuña a suspensión da Lei de Dependencia e xustificaba os recortes.