As enfermeiras sairán á rúa o próximo 8 de marzo –Día da Muller–  pola situación de “discriminación” que padecen “a pesar de ser a gran forza laboral e profesional do sistema sanitario”.

Convocadas polo Sindicato de Enfermaría, SATSE, as enfermeiras concentraranse para “esixir respecto profesional e denunciar o claro desinterese das administracións públicas por acabar cunha falta de recoñecemento motivada pola infravaloración histórica cara á muller e os coidados”.

“A profesión, desde os seus inicios, estivo moi marcada polas consideracións de xénero, o que condicionou o seu desenvolvemento e crecemento profesional. Na actualidade, aínda que se deberían superar os roles sexistas, séguese marxinando ás enfermeiras”, afirman desde o Sindicato.

Así, para denunciar a situación, o sindicato convocou concentracións ás portas dalgúns centros hospitalarios, entre eles, o Complexo Hospitalario Universitario de Coruña (CHUAC), na porta da planta 0 ás 11 da mañá.

DEMANDAS

Entre outras demandas, as enfermeiras de Galicia reclamarán unha nova clasificación profesional acorde coa ordenación actual dos títulos universitarios, o desenvolvemento competencial experimentado pola profesión nos últimos anos e a evolución social.

En concreto, pedirase ao presidente do Goberno, Pedro Sánchez, que coordine os distintos ministerios implicados na reforma do Estatuto Básico do Empregado Público (EBEP). “Unha Lei que discrimina, na actualidade, a esta profesión”, apunta SATSE.

Tamén se porá o foco nas concentracións na falta de recoñecemento, a dureza das súas condicións e riscos laborais, o que lles impide poder acceder á xubilación anticipada voluntaria; os estereotipos sexistas; un maior número de agresións físicas e verbais, e dificultades de conciliación.