A Audiencia Provincial da Coruña acollerá este martes o xuízo contra un mozo, de 18 anos de idade, para o que a Fiscalía solicita unha pena de oito anos de prisión por abusar sexualmente dunha muller que se fixo a durmida durante os feitos. Segundo recolle o escrito do Ministerio Público, o acusado, de nacionalidade peruana, atopábase no domicilio da vítima, situado na Coruña, e cando quedou durmida empezou a abusar sexualmente dela.

A muller chegouse a espertar, pero finxiu estar durmida “por temor a unha reacción violenta” do novo, aínda que esta “non se produciu en ningún momento”, relata a Fiscalía. Os feitos ocorreron na mañá do 24 de xuño de 2022 sobre as 8.30 horas da mañá e reciben a cualificación de abuso sexual conforme ao Código Penal vixente antes da coñecida ‘lei de só si é si’, porque a normativa anterior élle máis favorable. O mozo enfróntase a unha pena de oito anos de cárcere e outro cinco de liberdade vixiada. Así mesmo, deberá indemnizar á vítima en 10.000 euros polo dano moral causado.