O Concello da Coruña abre o xoves, 14 de marzo, a mostra que celebra o 50 aniversario do grupo musical Fuxan vos Ventos. A exposición, que leva por título ‘Fuxan vos ventos. 50 anos de historia’, inaugurarase na Sala Salvador de Madariaga, ás 19,00 horas, e contará coa presenza de Gonzalo Castro, concelleiro da área de Fomento e Promoción da Cidade; Sabela Fraga, comisaria da exposición e membros do propio grupo musical.

Esta exposición nace “da necesidade de celebrar os 50 anos de historia do grupo, pero tamén da de pór en valor o seu percorrido musical”, sinala o consistorio.

O proxecto expositivo xorde dun grupo de persoas entre os que se atopan varios membros de Fuxan vos Ventos; a comisaria, a directora de arte Melania Freire e a coordinadora do proxecto, Noa Díaz.