O Concello da Coruña comeza este luns unha nova intervención arqueolóxica no Castro de Elviña para determinar as causas históricas da desaparición dunha das torres da entrada. En concreto, a torre desaparecida daba entrada ao sector 16 do Castro de Elviña. Os traballos consisten na escavación de 105 metros cadrados na zona na que supostamente se atopaba a torre, hoxe desaparecida, así como na terraza localizada no extemo sur da área de protección do xacemento.

En función do material recolleito, o Concello prevé realizar varias probas de datacións por carbono 14 para determinar o momento de abandono da croa, da desaparición da torre e da construción da terraza sur do xacemento. Esta nova campaña súmase ás postas en marcha polo goberno local de Inés Rey para a posta en valor do xacemento, co que se busca avanzar no coñecemento das orixes da Coruña.

A intervención estará dirixida por persoal investigador do Instituto de Ciencias do Patrimonio (Incipit), que forma parte do Consello Superior de Investigacións Científicas (CSIC). O equipo técnico está formado por tres técnicos co correpondente persoal de apoio. O prazo estimado de finalización dos traballos será o 31 de maio. Ademais, durante a intervención, un total de sete alumnas do máster interuniversitario de Arqueoloxía e Ciencias da Antigüidade participarán na campaña para formarse na aplicación da metodoloxía e estratexia de intervención arqueolóxica.