Milleiros de persoas, hai quen apunta case 100.000 persoas, celebran xa o ascenso do Deportivo da Coruña a Segunda división. Unha fazaña histórica dun clube histórico. Un clube que é a xente, é A Coruña porque ninguén como o Depor é quen de mover na antiga Segunda B a milleiros de persoas e encher campos partido tras partido. Por iso, esta é a historia dunha cidade envorcada co seu equipo. Por iso, isto é o primeiro capítulo dunha serie que, de seguro, acabará coa volta a Primeira.

Minuto 57 e os 31.833 deportivistas que atoparon en Riazor cantaron xuntos o gol da icona do clube, Lucas Pérez, outra vez Lucas Pérez. E 33 minutos despois milleiros de persoas tomaban Riazor. A contorna do campo era unha festa. Unha festa que comezou xa moito antes, ao mediodía, coas peñas e seareiros por todos os recunchos da cidade. E a cidade segue sendo aínda unha festa.

A tradicional celebración na Praza de Catro Camiños terá que agardar. E todo por unha mala decisión do clube. Haberá que agardar ao sábado 25 cando termine a fase regular do campionato, fronte á Real Unión de Irún, para tomar a histórica fonte coruñesa.

O Dépor logra novamente regresar ao fútbol profesional despois de catro tempadas. Catro temporadas marcadas pola frustacción de varias campañas a piques de subir na liguiña de ascenso. Pero a cuarta foi a vencida. Coruña goza agora de momentos deportivos épicos; a suba das nosas á primeira, a suba do Dépor a Segunda e a do Bascket Coruña á Liga de Ouro do baloncesto español.